Ramlian nun hngar lo in ee
Lungrawn zalam, chumtual rawn ah
Komhawi rual he zaandai tang
Lungthin pakhat I hrawm lio
Kan cung a ceu thlapa hmuh caan
A rak nuam khun...
Chun ceu nih Liam in, khuamuih aa tim
Kan zuat ar zong riahinn an hrui cang hna
Va phuntling nih lungrawn khua zel in
Rung awn cang hna, khing riangmang in
Zaandai thlapa a lang, hawikom kan tling
Nuamhnak a tling, lungrawn aa lawm...
Zinglei khuamawt fingrei cah lai
Khuachuah tlang in fiakfaiva nih
Khing riangmang in rung awn tawn kaw
Khuaza a khenh, milung a hlau
Khuadei aa tim, lung hna a ngam, mitkuh a thaw
Ka pi aw nem "tho cang, khua a dei cang" timi aw
Ka hun hlam I ka pu zong ka ngai...
Chun ceu liam in khua nih muih aa tim than lai
Va phuntling nih an zai aw dawh thleng loin
lungrawn khua zel than hna lai,kha hlan bang
Thlatangpa nih var ririai in a hung lang than lai
A ho hen ruun chumtual ah aa nuam ti hnga?
Ruun chumtual rawn kan rak I nuamh tawn kha
Semmang rual nih an run pehzulh ti hnga maw?
Zinglei khuamawt fingrei cah lai,khuachuah tlangin
Khing riangmang in lungrawn a hlau tawntu
Fiakfaiva kha tah a awn zuam ti hnga maw?
thing tuk cang lai mu, nehhlun vialte kha
Tuzaan, ka semnak lungrawn khua kha ngai in
Hawikom vialte hna zong philh loin ka hlam hna...
By Ceu Tha
