A sinain nihin kan nih chan zoh tikah Lairam hi kan ram a si ko nain kanmah ram,vawlei cung hmanhah duhning in khua a sa kho lomi miphun kan si. Kan mah holh a si mi Laiholh hmanh kan duh in ka cawng,kan hmang kho lo. Kan thuam,kan thil, kan nunphung hna duh paoh in hmannak nawl a ngei lomi miphun kan si. Zeiruang ah dah kan mah holh, kan mah a si ko mi hi kan hman khawh lo? Kan holh aa dawh lo ruangah le “Laiholh” timi a tlin lo tuk ruang zong ah ah a si theng lai lo, cu caah, nihin mi no hna zeiruang ah dah zalong in cawn/hman khawh lo, a ho ruangah timi hi ruah kan herh cang.
Unau, zeiruangah dah mi ramdang kan zaam dih? Zei ruangah dah kan nung ko na buin aa hmu ti lo dingin kan I then? Na ruat bal maw? Lairam kan duh lo ruangah a si lem lai lo. Lairam a nuamh lo ruang zong ah a si theng lai lo. Cu si ah, ziah Lairam kan dawt tuk ko buin, kan duh,kan tleihchan tuk ko buin, kan I nuamh tuk nak ram a si ko nain zeiruangah dah mitthli kha vialte a luan kun? A ho ruangah dah Laimi vialte mah le mah hmanh hngal loin ramkip ah kan I then dih kun? A ho dah a kan doh zungzal tu, a hodah kan ral? Ruah kan herh cang.
Nihin Laimi kan sining hi ruat hmanh, mi ramdangah hawi hngar zungzal in sal bang mi duh lomi rian a tuantu, hawi nak in rian har a tuantu kan si nain hawi hmuh zat a hmu bal lomi, mi nih neek mi, mi nih nihsawh mi, zohchuk mi kan si. A sual lo buin “a sual” ti zungzal dingmi miphun kan si ding hi na ruah khawh ko maw? Hawi dawt, Lairam hi hawinak niam ah um ding, hawinak in sifaak ding, ramdang sal, mi duh lomi rian a tuantu si zungzal ding, mi nih zohchuk in hawi nun a hngar zungzal ding ah kan biak mi kan Pathian nih a kan ser lo. Cun, hi vialte tuar ding le in ding hi a kan siang lo dahkaw.
Cu caah cun, Lairam cu kan duh zongah duh lo zong ah kan ram
asi cang. Kan I thleng kho ti lo. Laimi si duh lo ruangah ramdang sining,
ramdang holh in va holh leen hmanh law “Laimi” na sinak zeitik hmanh ah na kal
tak kho lai lo. Phundang in ka chim ahcun “Laimi ka si lo” na ti ahcun “ram ka
ngei lo” ti he aa khat cang.Cu caah cun Lairam a that lo ruangah, a sifah
ruangah le a nuamh lo ruangah a nuamhnak ram, a rum mi ram hna le ram dawh hna
ah tlik le zaamtaak I timh lengmah si ti loin, kan mah kan semnak ram, a rawk
cia ram, a ttet cia ram kha hawi nak sang deuh in mi nih zohcho tlak si dingin
kan remh than ding tu hi a biapi deuh mi a si.
By Ceu Tha
